अनुसूचित जमातीच्या विदयार्थ्यांकरिता नाशिक येथील इंग्रजी माध्यमाच्या शाळेतील प्रवेशाकरिता अर्ज पाठवावेत

       जळगांव, दि. 12 :- आदिवासी विकास विभागा मार्फत नाशिक येथील इंग्रजी माध्यमांच्या एकलव्य रेसिडेन्शीयल पब्लीक स्कूल मध्ये सन 2013-14 या शैक्षणिक वर्षात अनुसूचीत जमातीच्या विदयार्थ्यांना इयत्ता 6 वी मध्ये प्रवेशाकरिता 31 डिसेंबर 2012 पर्यंत यावल एकात्मीक आदिवासी विकास प्रकल्प कार्यालयाकडे अर्ज करण्याचे आवाहन प्रकल्प अधिकारी श्री. सोनवणे यांनी केले आहे.

         सदरची प्रवेश परीक्षा शासकीय माध्यमिक आश्रमशाळा, दहिवद ता. अंमळनेर जि. जळगांव व शासकीय आश्रमशाळा, गंगापूरी ता. जामनेर, जि. जळगांव या दोन परिक्षा केंद्रावर स्पर्धा परिक्षा रविवार दिनांक 3 मार्च, 2013 रोजी सकाळी 11 ते 13.00 या वेळेत आयोजित करण्यात आली आहे. जे आदिवासी विदयार्थी सन 2012 – 13 या चालू शैक्षणिक वर्षा मध्ये इयत्ता 5 वी च्या वर्गात शिकत असून, परीक्षेला बसलेले आहेत. व पुढील वर्षी इयत्ता 6 वी मध्ये प्रवेश घेणार आहेत अशा इच्छूक विदयार्थ्यांनी आपल्या शाळेतील मुख्याध्यापका मार्फत प्रकल्प अधिकारी, एकात्मिक आदिवासी विकास प्रकल्प कार्यालय यावल जि. जळगांव यांचे कडे दिनांक 31 डिसेंबर 2012 पर्यंत अर्ज करावेत.

       अर्जाचा नमुना प्रकल्प कार्यालय, यावल व सर्व गट शिक्षणाधिकारी, पंचायत समिती येथे उपलब्ध आहे. सदर परिक्षा शासकीय आश्रमशाळा, अनुदानित आश्रमशाळा, जिल्हा परिषद शाळा व इतर मान्यताप्राप्त शैक्षणिक संस्थेत शिक्षण घेत असलेले इ. 5 वी च्या विदयार्थ्या करीता पूर्णंत: खुली आहे. तथापी विदयार्थ्यांच्या पालकांचे वार्षिक कमाल उत्पन्न रु. एक लाखाच्या आत असावे. व पालक शासकीय व निमशासकीय नोकरीत नसावे. अर्जा सोबत सक्षम अधिका-यांनी दिलेला पालकांच्या वार्षिक उत्पन्नाचा दाखला जोडणे आवश्यक आहे. अनुसूचित जमातीतील अपंग विदयार्थ्यांसाठी 3 टक्के व आदिम जमातीच्या विदयार्थ्यांसाठी 5 जागा आरक्षित राहतील. तरी सदरच्या योजनेचा लाभ जळगांव जिल्हयातील अनुसूचीत जमातीतील विदयार्थ्यांनी घ्यावा असे आवाहन यावल एकात्मिक आदिवासी विकास प्रकल्प कार्यालयामार्फत करण्यात येत आहे.