क्रीडांगण विकास अनुदान योजनेकरिता अर्ज पाठवावेत ..जिल्हा क्रीडा अधिकारी सुनंदा पाटील

            जळगांव, दि.6:- शासनाचे क्रीडा व युवकसेवा संचालनालय विभागामार्फत क्रीडांगण विकास योजनेची अंमलबजावणी करण्यात येत आहे तरी जळगांव जिल्हयातील माध्यमिक शाळा, महाविदयालये, क्रीडा संस्था व मंडळे आदिनी सदरच्या योजनेकरिता अर्ज पाठविण्याचे आवाहन प्रभारी क्रीडा अधिकारी श्रीमती सुनंदा पाटील यांनी केले आहे.

           जिल्हास्तरावर सदरची योजना जिल्हा क्रीडा अधिकारी कार्यालयामार्फत राबविण्यात येते  शासनाचे क्रीडा धोरणानुसार या योजनेअंतर्गत जिल्हयातील माध्यमिक शाळा, कनिष्ठ महाविदयालये तसेच विविध खेळांच्या विकासासाठी कार्यरत असणा-या पंजीबध्द संस्था, क्रीडा मंडळे, युवक मंडळे, महिला मंडळे याशिवाय स्थानिक स्वराज्य संस्थेमार्फत चालविण्यात येणा-या प्राथमिक, माध्यमिक, कनिष्ठ महाविदयालये आणि आदिवासी विकास विभागामार्फत चालविण्यात येणा-या आश्रमशाळा यांना उदयोन्मुख खेळाडूंना त्यांचे क्रीडा गुण विकसीत करण्यासाठी सुयोग्य क्रीडांगण व क्रीडांगणावर मुलभूत सुविधा मोठया प्रमाणात उपलब्ध होण्याच्या दृष्टीने, आर्थिक मदत देण्यात येते. त्या अंतर्गत क्रीडांगण समपातळीत करणे, 200 मी. अथवा 400 मी. चा धावनमार्ग तयार करणे, क्रीडांगणास कुंपण घालणे, विविध खेळांची प्रमाणित क्रीडांगणे तयार करणे, प्रसाधन गृह बांधणे, पाण्याची सुविधा निर्माण करणे, भांडारगृह बांधणे या प्रत्येक बाबींकरीता खर्चाचे अंदाजे 50 टक्के किंवा कमाल रु. 2.00 लाख यापैकी कमी असेल इतकी रक्कम अनुदान म्हणून दोन हप्त्यात देण्यात येते.

            याकरिता संस्थेच्या मालकीची किंवा दीर्घ मुदतीच्या करारावर (33 वर्षाचे वर) उपलब्ध असलेली सुयोग्य आकारमानाची सलग जागा उपलब्ध असणे आवश्यक आहे. 200 मी. अथवा 400 मी. धावनमार्ग करता येईल. अशी सुयोग्य आकाराची व सलग जमीन असणे आवश्यक आहे. योजनेचे विहित नमुन्यातील अर्ज व योजनेविषयीच्या अधिक माहितीसाठी जिल्हा क्रीडा अधिकारी कार्यालय, छ. शिवाजी महाराज जिल्हा क्रीडा संकुल, जळगांव येथे कार्यालयीन वेळेत प्रत्यक्ष भेट देवून संपर्क साधावा.

0 0 0 0 0