3 ते 12 जानेवारी दरम्यान राजमाता जिजाऊ आणि क्रांतीज्योती सावित्रीबाई फुले जाणीव-जागृती अभियान

            नाशिक दि. 2: - म‍हिला व बाल विकास विभागाअंतर्गत महिला व बालकांच्या विकासासाठी विविध प्रकारच्या संस्थांतर्गत व संस्थाबाह्य उपक्रम आणि सेवा पुरविण्यात येतात. स्त्री जन्माबाबतची उदासिनता कमी करून स्त्री जन्माचे स्वागत करणे, मुलगा-मुलगी भेदभाव नष्ट करणे, हुंड्यासारख्या अनिष्ठ प्रथा बंद करणे, स्त्रियांवर होणारे शारिरीक, मानसिक, आर्थिक, भावनिक, लैंगिक अत्याचार होवू न देणे, बालकांच्या हक्कांचे संरक्षण करण्यासाठी पालकांमध्ये आणि समाजात जागृती निर्माण करणे तसेच एकात्मिक बाल विकास सेवा योजनेअंतर्गत पुरविण्यात येणाऱ्या विविध सेवा त्याचप्रमाणे केंद्र व राज्य शासनाच्या महिला व बाल विकासाच्या योजना समाजातील तळागाळापर्यंत  पोहचाव्यात आणि सदर योजना लोकाभिमुख होवून अशा सेवांचा व योजनांचा लाभ घेण्यासाठी राज्यातील दुर्बल व गरजू घटक पुढे यावेत.

            याबाबत महिला व बालकांसाठी असणाऱ्या सामाजिक कायद्यांची माहिती प्रत्येक घरात पोहचविण्यासाठी दि. 3 जानेवारी, 2013 ते 12 जानेवारी, 2013 या कालावधीत राजमाता जिजाऊ आणि क्रांतीज्योती सावित्रीबाई फुले जाणीव-जागृती अभियान  जिल्हा, प्रकल्प, व अंगणवाडी स्तरावर राबविण्यात येत आहे. या अभियान कालावधीत चर्चासत्रे, पथनाट्य, रॅली, एकांकिका, स्पर्धा, प्रशिक्षण शिबीर, कठपुतली शो यासारख्या कार्यक्रमांचा समावेश असणार आहे, असे विभागीय उपायुक्त, महिला च बाल विकास विभाग, नाशिक विभाग, नाशिक यांनी कळविले आहे.