राष्ट्रीय पिक विमा योजनेस 15 जानेवारीपर्यंत मुदतवाढ

चाळीसगांव दि. 11:- राष्ट्रीय कृषी विमा योजनेत राज्यातील जास्तीत जास्त शेतक-यांना सहभागी होता यावे आणि योजनेचा लाभ शेतक-यांना व्हावा यासाठी रब्बी हंगामातील पिकांचा विमा उतरविण्याकरीता या विमा योजनेस 15 जानेवारी 2013 पर्यंत मुदतवाढ देण्यात आलेली आहे. ही मुदतवाढ  गहू व हरभरा या पिकांसाठी लागू करण्यात आली आहे.

त्यानुसार तालुक्यातील कार्यक्षत्रात येणा-या शेतक-यांसाठी राष्ट्रीय पिक विमा योजना लागू करण्यांत आलेली असून शेतक-यांना नैसर्गिक आपत्ती, किड व रोग कारणांमुळे नुकसान झाल्यास त्याची नुकसान भरपाई देण्याचा मुख्य उद्देश या राष्ट्रीय पिक योजनेचा आहे.

सन 2012-13 या रब्बी हंगामात गहू व हरभरा या पिकांची पेरणी करण्यात आलेली आहे. रब्बी हंगामात विमा अधिसुचित क्षेत्रात वाढविण्यात येत आहे. पुर, चक्रीवादळ, भुस्खलन व गारपीट या स्थानिक आपत्तीमुळे पेरणी केलेल्या पिकांची कमी उत्पन्न देण्याची शक्यता आहे. त्यामुळे गहू व हरभरा या पिकांचा पिक विमा काढल्यास शेतक-यांना फायदा होऊ शकतो. तसेच रब्बी हंगामात शेतक-यांनी अतिरिक्त क्षेत्रासाठी पिक विमा काढल्यास अधिक फायदा होऊ शकतो.

या पिक विमा योजनेचा लाभ घेण्यासाठी तालुक्यातील जास्तीत जास्त शेतक-यांनी सहभागी होऊन गहू व हरबरा या पिकांचा पिक विमा उतरविण्याबाबत मंडळ स्तरावर मंडळ कृषि अधिकारी व कृषि पर्यवेक्षक व गांवस्तरावर कृषि सहायक व कृषि सेवक यांच्याशी किंवा गावानजिकच्या बँकेशी संपर्क साधावा, असे आवाहन तालुका कृषि अधिकारी श्री. व्ही. एस. शिंदे यांनी एका प्रसिध्दी पत्रकान्वये केले आहे.

*****