जिल्हयात छायाचित्र मतदार याद्यांचा पुर्नरिक्षण व नवीन मतदार नोंदणी कार्यक्रमास सुरुवात

         जळगाव दिनांक 1 - जिल्हयातील सर्व विधानसभा मतदार संघाच्या छायाचित्रासह मतदार याद्यांचे संक्षिप्त प्रकारे विशेष पुर्नरिक्षणाच्या कार्यक्रमास आजपासून सुरुवात झाली असून त्याकरिता प्रारुप मतदार याद्यांची प्रसिध्दी जिल्हाधिकारी ज्ञानेश्वर राजूरकर यांच्या हस्ते जिल्हाधिकारी कार्यालयात करण्यात आली व आज (दिनांक 1 ऑक्टोंबर) पासून जिल्हयातील सर्व विधानसभा मतदार संघात सदरच्या कार्यक्रमास सुरुवात झाली.

          या कार्यक्रमातंर्गत आज दिनांक 1 ऑक्टोंबर रोजी जिल्हाधिकारी ज्ञानेश्वर राजूरकर यांच्या हस्ते प्रारुप मतदार याद्यांची प्रसिध्दी झाली तसेच या याद्यांसंबंधी दावे व हरकती दिनांक 1 ते 31 ऑक्टोंबर,2012 पर्यंत स्विकारल्या जाणार आहेत. त्याप्रमाणेच प्रारुप यादीच्या भागाचे ग्रामसभा, स्थानिक संस्था, मोहल्ला सुधार समिती येथे वाचन करुन नावांची पडताळणी दिनांक 6 ते 9 ऑक्टोंबर,2012 या कालावधित करण्यात येईल त्यानंतर जिल्हयातील सर्व राष्ट्रीय व राज्यस्तरीय राजकीय पक्षांचे मतदान केंद्रस्तरीय अभिकर्ते यांच्या उपस्थितीत दावे व हरकती स्विकारण्याची विशेष मोहिम 7 ऑक्टोंबर, 14 ऑक्टोंबर व 21 ऑक्टोंबर,2012 रोजी संपन्न होईल.

          या याद्यांबाबत आलेले दावे व हरकती दिनांक 1 डिसेंबर,2012 रोजी निकालात काढले जाणार आहेत त्यानंतर डाटाबेस अद्यावतीकरण व पुरवणी यादीची तयारी व छपाईचे काम दिनांक 1 ते 31 डिसेंबर,2012 या दरम्यान केले जाऊन अंतिम मतदार यादी दिनांक 5 जानेवारी,2013 रोजी प्रसिध्द करण्यात येणार आहे.

          तरी जिल्हयातील सर्व विधानसभा मतदार संघातील मतदारांनी प्रारुप मतदार याद्यांबाबतचे दावे व हरकती नोंदवाव्यात तसेच नव मतदारांनी मतदार यादीत नाव नोंदविण्याचे आवाहन          ज्ञानेश्वर राजूरकर यांनी केले.

यावेळी उपजिल्हानिवडणूक अधिकारी संतोष थिटे यांनी मतदार यादी पुर्नरिक्षणाबाबतच्या विविध टप्प्यांची सविस्तर माहिती दिली. यावेळी जिल्हाधिकारी ज्ञानेश्वर राजूरकर, उपजिल्हानिवडणूक अधिकारी संतोष थिटे, शिक्षणाधिकारी (मा) शशिकांत हिंगोणेकर, पोलिस निरिक्षक योगेश मोरे आदि उपस्थित होते.