शिक्षक पात्रता परीक्षा नोव्हेंबर, 2013 मध्ये प्रस्तावित

शिक्षक पात्रता परीक्षा

नोव्हेंबर, 2013 मध्ये प्रस्तावित

 नाशिक दि. 04 :- केंद्र पुरस्कृत “बालकांचा मोफत व सक्तीच्या शिक्षणाचा अधिकार अधिनियम, 2009” व राज्य शासनाचे शासन निर्णय दिनांक 13 फेब्रुवारी, 2013 अन्वये यापुढे इयत्ता 1 ली ते 8 वी वर्गासाठी शिक्षक पदावर नियुक्त होणाऱ्या उमेदवारांसाठी शिक्षक पात्रता परीक्षा (Teacher Eligibility Test) अनिवार्य करण्यात आली आहे. पहिल्या शिक्षक पात्रता परीक्षेचे आयोजन नोव्हेंबर, 2013 मध्ये प्रस्तावित आहे. सदर परीक्षा सर्व शाळा (सर्व व्यवस्थापन/ माध्यम/ परीक्षामंडळे/ खाजगी अनुदानित- विनाअनुदानित -स्वयंअर्थसहाय्यित इत्यादी) मध्ये काम करण्यास इच्छुक असणाऱ्या शिक्षकांसाठी लागू राहतील.

            कनिष्ठ प्राथमिक (इयत्ता 1 ते 5) व उच्च प्राथमिक (इयत्ता 6 ते 8) या दोन गटातील शिक्षक पदासाठी प्रत्येकी 1 प्रश्नपत्रिका राहिल. त्याचे स्वरूप व काठीण्य पातळी अनुक्रमे माध्यमिक व उच्च माध्यमिक अभ्यासक्रमावर आधारीत असेल. दिनांक 13 फेब्रुवारी, 2013 च्या शासन निर्णयाने निश्चित केलेली शैक्षणिक व व्यावसायिक अर्हता प्राप्त केलेले उमेदवार फक्त ह्या परीक्षेला प्रविष्ठ होण्यास पात्र राहतील. सदर परीक्षेबाबत सविस्तर माहिती महाराष्ट्र राज्य परीक्षा परिषदेच्या www.mscepune.in या संकेतस्थळावर उपलब्ध आहे. या परीक्षेचा सविस्तर कार्यक्रम स्वतंत्रपणे प्रसिध्द करण्यात येईल, असे आयुक्त, महाराष्ट्र राज्य परीक्षा परीषद, पुणे यांचेकडून कळविण्यात आले आहे.

                    -----***-------