महाविद्यालयीन स्तरावर मतदार नोंदणी कार्यक्रम 16 सप्टेंबर रोजी

महाविद्यालयीन स्तरावर मतदार नोंदणी कार्यक्रम 16 सप्टेंबर रोजी 

            चाळीसगांव,दिनांक 15 :- विधानसभा निवडणुक 2014 च्या अनुषंगाने भारत निवडणुक आयोगाच्या सुचनेनुसार दिनांक 16 सप्टेंबर, 2014 रोजी तालुक्यातील महाविद्यालयांमध्ये मतदार नोंदणी कार्यक्रमाचे आयोजन करण्यात आल्याचे उपविभागीय अधिकारी तथा मतदार नोंदणी अधिकारी मनोज घोडे पाटील यांनी कळविले आहे. दिनांक 01.01.2014 या अर्हताकारी दिनांकाला ज्या विद्यार्थ्यांचे वय 18 वर्षे पुर्ण झालेले आहे अशा नव मतदार विद्यार्थ्यांनी या विशेष  मोहिमेत सहभागी होऊन आपले नाव मतदार यादी समाविष्ठ करुन घ्यावे असे आवाहन प्रातांधिकारी मनोज घोडे यांनी केले आहे.

            भारत निवडणूक आयोगाच्या दिनांक 12.09.2014 च्या पत्रान्वये विधानसभा सार्वत्रिक निवडणूक 2014 ची घोषणा झाली असून महाविद्यालयीन स्तरावर मतदार नोंदणीबाबत विशेष  मोहिम राबविणेकामी  017 चाळीसगांव विधानसभा मतदार संघात दिनांक 16 सप्टेंबर, 2014 रोजी या विशेष मोहिमेचे आयोजन करण्यात आले आहे. महाविद्यालयीन स्तरावर मतदार नोंदणी कार्यक्रमासाठी भारतीय लोकप्रतीनिधीत्व अधिनियम 1950 चे कलम 13 क अन्वये तालुक्यातील 13 राजपत्रीत अधिकारी तर सहाय्यक व कर्मचारी मिळून 39 कर्मचा-यांची सेवा अधिग्रहीत करुन या विशेष मोहिमेसाठी त्यांची नियुक्ती देखील  प्रातांधिकारी तथा मतदार नोंदणी अधिकारी मनोज घोडे यांनी केली आहे. तरी मतदार संघातील ज्या विद्यार्थ्यांचे मतदार यादीत नाव नाही अशा नव मतदारांनी आपले नाव मतदार यादीत समाविष्ठ करून आपला मतदानाचा हक्क प्राप्त करावा व राष्ट्रीय कार्यात सहभाग नोंदवावा असे आवाहन त्यांनी केले आहे.

तहसिल कार्यालयात मतदार सहाय्य्‍ता केंद्राची स्थापना

            017 चाळीसगांव विधानसभा मतदार संघासाठी चाळीसगांव तहसिल कार्यालयात मतदार सहाय्यता केंद्राची स्थापना करण्यात आली असून तेथील दुरध्वनी क्रं. 02589-224011 असा आहे. व या मतदार सहाय्यता केंद्राचे प्रमुख म्हणून निवासी नायब तहसिलदार विशाल सोनवणे यांची नेमणूक प्रातांधिकारी मनोज घोडे पाटील यांनी केली आहे. मतदार आपले नाव मतदार यादी असल्याची खातरजमा व मतदान कार्यक्रमाविषयी आवश्यक असलेली माहिती या मतदार सहाय्यता केंद्रातून प्राप्त करु शकतात असेही प्रातांधिकारी मनोज घोडे पाटील यांनी कळविले आहे. उमेदवारांनी काय करावे किंवा काय करु नये या बाबतची माहिती व सुचनांचा तपशिल हा निवडणूक आयोगाच्या www.eci.nic.in  या संकेत स्थळावर उपलब्ध आहे तर उमेदवारांनी दाखल केलेली शपथ पत्र व खर्चाचे तपशिलांची माहिती ही वेळोवेळी http://ceo.maharashtra.gov.in किंवा http://ceo.maharashtra.nic.in या संकेत स्थळावर उपलब्ध होणार असल्याचे  त्यांनी कळविले आहे.

                                                        * * * * * * * *