जळके गावांमधील शिरपूर पॅटर्न बंधा-याचे काम कौतुकास्पद-जलसंधारण राज्यमंत्री गुलाबराव देवकर

        जळगांव, दिनांक 2 - जिल्हयात प्रशासनाकडून प्रायोगिक तत्वावर शिरपूर पॅटर्नचे बंधा-याची कामे सुरु होणार आहेत. परंतू जळके ग्रामस्थांनी शासनाच्या मदतीची अपेक्षा न करता लोकसहभागतून गावांमध्ये शिरपूर पॅटर्न बंधारा बांधण्याचे काम सुरु केलेले असून त्यांचे काम कौतुकास्पद असल्याचे प्रतिपादन जलसंधारण राज्यमंत्री तथा पालकमंत्री ना.गुलाबराव देवकर यांनी केले.

        जळके ग्रामस्थांनी गावांमधे सुरु केलेल्या शिरपूर पॅटर्न बंधारा कामाची पाहणी  प्रसंगी ना.देवकर बोलत होते. यावेळी जिल्हाधिकारी ज्ञानेश्वर राजूरकर, जिल्हा अधिक्षक कृषि अधिकारी किसन मुळे, सरपंच श्रीमती प्रतिभा पाटील, सुभाष पाटील, जिल्हा सहकारी बँकेचे संचालक वाल्मीक पाटील, उपविभागीय कृषि अधिकारी तानाजी खरडे व जळके ग्रामस्थ मोठया संख्येने उपस्थित होते.

         ना.देवकर म्हणाले जलसंधारणाच्या कामांमध्ये शासनाकडून अर्थसहाय्य करण्यात येते. परंतू जळके ग्रामस्थांनी सदर बंधा-याच्या कामाची प्रथम सुरुवात करुन जिल्हयातील इतर गावांसमोर  आदर्श ठेवल्याचे त्यांनी सांगितले. कारण लोककल्याणकारी योजनांमध्ये लोकांचाही सहभाग महत्वाचा आहे असे त्यांनी म्हटले. जिल्हयातील सर्व गावांनी लोकसहभागातून जलसंधारणाची अशी कामे पूर्ण करावीत त्याकरिता आवश्यक ते सर्व सहकार्य करण्यात येईल असे आश्वासन त्यांनी दिले.

            जिल्हयात शिरपूर पॅटर्नच्या कामांकरिता जिल्हा नियोजन समिती व इतर शासकीय योजनांमधून निधीची तरतुद करण्याचा प्रयत्न करण्यात येत असल्याची माहिती सांगून जळके ग्रामस्थांना शिरपूर पॅटर्न बंधा-यांच्या कामांसाठी एक लाख रुपयांची मदत दोन दिवसात देण्यात येईल, असे आश्वासन ना.देवकर यांनी दिले.

जळके ग्रामस्थांना पालकमंत्रयांच्या हस्ते धनादेश

            महात्मा फुले जल व भूमि अभियानातंर्गत जलसंधारणाच्या कामांसाठी देण्यात येणा-या  अर्थसहाय्यातून कृषि विभागामार्फत जळके ग्रामस्थांनी केलेल्या शिरपूर पॅटर्न  बंधा-यांच्या कामासाठी प्रातिनिधिक स्वरुपात 50 हजाराचा धनादेश ना.देवकर यांच्या हस्ते सरपंच श्रीमती प्रतिभा पाटील यांना देण्यात आला तसेच सदर कामाची अंदाजे रक्कम 3 लाख रुपये झाली असून ती लवकरच ग्रामस्थांना दिली जाईल, असे जिल्हा अधिक्षक कृषि अधिकारी किसन मुळे यांनी सोगितले.      

* * * * * * * *