भरारी पथकांच्या वाहनातून मतदान जागृतीचे अहिराणी बोल ! अहिराणी लोकगीतांव्दारे करणार मतदारांमध्ये प्रबोधन : प्रांताधिकारी गणेश मिसाळ

भरारी पथकांच्या वाहनातून मतदान जागृतीचे अहिराणी बोल !

अहिराणी लोकगीतांव्दारे करणार मतदारांमध्ये प्रबोधन

: प्रांताधिकारी गणेश मिसाळ

            चाळीसगांव,दिनांक 01:- कटाया कराना नही, बठ्ठासनी मतदान करानं, मतदान हाऊ आपला हक्क शे !  असे आवाहन करणारी ध्वनी फित भरारी पथकांच्या वाहनावर बसविलेल्या ध्वनीक्षेपणाव्दारे प्रसारण करुन मतदान जनजागृतीचा शुभारंभ आज पाचोरा येथुन करण्यात आला. या प्रसंगी निवडणूक निर्णय अधिकारी तथा प्रांताधिकारी गणेश मिसाळ, पाचोरा तहसिलदार गणेश मरकड, भडगांव तहसिलदार कापसे, पोलीस निरीक्षक रामेश्वर गाढे पाटील, नायब तहसिलदार आबा महाजन, नायब तहसिलदार अमित भोईटे आदि उपस्थित होते.

 विधानसभा सार्वत्रिक निवडणूक-2014 च्या अनुषंगाने 018-पाचोरा विधानसभा मतदार संघामधील ग्रामीण भागातील जनतेमध्ये प्रबोधन होण्यासाठी भरारी पथकांच्या वाहनातून मतदान जागृतीसाठी अहिराणी बोल असलेली अहिराणी लोकगीतांव्दारे प्रचार प्रसिध्दी करण्यात येणार असून या उपक्रमाचा नक्कीच फायदा होईल तसेच लोकसभेच्या तुलनेत मतदानाची टक्केवारी वाढेल असा विश्वासही प्रांताधिकारी मिसाळ यांनी यावेळी बोलून दाखविला. त्याच बरोबर निवडणूकीत दाखविण्यात येणा-या प्रलोभनांवर आळा घालण्यासाठी भारतीय दंड विधान 1860 अन्वये 171 कलमाचे देखील या वाहनांवरून प्रबोधन करण्यात येणार असल्याचे निवडणूक निर्णय अधिकारी तथा प्रांताधिकारी गणेश मिसाळ यांनी कळविले आहे.

                   

                                                        * * * * * * * *