निर्भय व निष्पक्ष निवडणूका होण्यासाठी निवडणूक खर्च संनियंत्रण यंत्रणा कार्यान्वीत : निवडणूक खर्च निरीक्षक नरेश बुंदेल

निर्भय व निष्पक्ष निवडणूका होण्यासाठी

निवडणूक खर्च संनियंत्रण यंत्रणा कार्यान्वीत

: निवडणूक खर्च निरीक्षक नरेश बुंदेल

 

            चाळीसगांव,दिनांक 24:- निवडणूकांच्या प्रचार कार्यासाठी पैसा आवश्यक असल्यामुळे पैशांचा वापर केल्याशिवाय बहुपक्षीय लोकशाही अस्तित्वात येऊ शकत नाही हे खरे असले तरी पैशांच्या गैरवापरामुळे निवडणूकांच्या रिंगणात असलेल्या उमेदवारांमधील विषमता, निकोप स्पर्धेचा अभाव, प्रचाराच्या नावाखाली अनेक राजकारणी व्यक्तींची अभिस्वीकृती आणि कायद्याची पायमल्ली करुन कलंकित शासन व्यवस्थेची निर्मीती यासारखे धोके निर्माण होऊ शकतात, हे धोके लक्षात घेऊन भारत निवडणूक आयोगाने राजकीय पक्ष, प्रसार माध्यमे व नागरी संस्था या सारख्या हितसंबंधितांशी विचारविनीमय करुन निर्भय  व निष्पक्ष निवडणूका घेण्यासाठी निवडणूक खर्च संनियंत्रण यंत्रणा कार्यान्वीत केली आहे. असे प्रतिपादन निवडणूक खर्च निरीक्षक नरेश बुंदेल यांनी आज या.ना.चव्हाण  महाविद्यालयातील कार्यक्रमात केले.

            या कार्यक्रमाला निवडणूक निर्णय अधिकारी  मनोज घोडे पाटील, सहा.निवडणूक निर्णय अधिकारी बाबासाहेब गाढवे, सहा. खर्च निरीक्षक ईश्वर घोडे, उपविभागीय पोलीस अधिकारी केशव पातोंड, या.ना.चव्हाण महाविद्यालयाचे प्राचार्य ‍ आदि उपस्थित होते.

            महाविद्यालयातील विद्यार्थ्यांशी संवाद साधतांना श्री.बुंदेल म्हणाले की, निवडणूकीच्या काळात करण्यात येणारे गुंतागुंतीचे अंतर्गत व्यवहार विचारात घेता, त्यासाठी होणा-या पैशांच्या गैरवापराला आळा घालणे हे एक मोठे आव्हान आहे. या प्रक्रियेत अजूनही अनेक बदल होत आहेत. आणि निवडणूकांचे पावित्र्य जपण्यासाठी भरघोस प्रयत्नांची व सर्व हितसंबंधितांकडून सहकार्य मिळविण्याची गरज असल्याचेही ते यावेळी म्हणाले. जागरूक मतदार म्हणून सर्व मतदारांनी लोकशाही बळकट करण्यासाठी पुढाकार घ्यावा व  कुठल्याही प्रलोभनांना बळी न पडता निर्भय व निष्पक्षपणे मतदान करावे व मतदानाचा टक्का वाढवावा असे आवाहनही त्यांनी यावेळी केले.

तहसिल कार्यालयात घेतली आढावा बैठक

निवडणूक कामकाजासाठी स्थापन करण्यात आलेल्या विविध पथकांची व स्थापन केलेल्या कक्ष प्रमुखांची आढावा बैठक आज निवडणूक खर्च निरीक्षक नरेश बुंदेल यांनी  तहसिल कार्यालयातील सभागृहात घेतली.यात प्रामुख्याने कॉल सेंटर मधून मतदारांना वेळोवेळी  माहिती उपलब्ध करुन देण्याची दक्षता घेण्याच्या सुचना ‍संबंधितांना देण्यात आल्या तर सहाय्यक खर्च निरीक्षकांच्या देखरेखीखाली उमेदवारांचे खर्चाचे रजिष्टर,दिलेला खर्च तपासणी  त्याची पडताळणी करुन वेळावेळी अहवाल पाठविणे, भरारी पथकांनी  व चेक पोस्ट वरील अधिकारी  कर्मचारी व पोलीस कर्मचा-यांनी वाहनांच्या तपासणीवेळी संयम व नम्रपणे आपले कर्तव्य बजवावे. व्हीडीओ व्हिव्हींग टीमचे चित्रीकरण हे प्रचार सभेतील खर्चासाठी महत्वपुर्ण असून कामात कुचराई करु नये अशा प्रकारच्या सुचना व मार्गदर्शन श्री.बुंदेल यांनी  या बैठकीत केले.

बिलाखेड चेकपोस्टला निवडणूक खर्च निरीक्षकांची भेट

            तालुक्यातील बिलाखेडे येथे स्थापन केलेल्या चेकपोस्टला निवडणूक खर्चनिरीक्षक नरेश बुंदेल यांनी भेट देऊन कामकाजाची माहिती जाणून घेतली. तसेच कर्तव्यावर उपस्थि त अधि कारी व कर्मचारी यांना कामकाजासंबंधी सुचना दिल्या  कामकाजात कुठल्याही प्रकारची अडचण आल्यास थेट संपर्कासाठी मोबाईल क्रमांकही त्यांनी  सर्व अधिकारी कर्मचा-यांना दिला. कामकाजात पारदर्शीपणा ठेवून सोपविलेली जबाबदारी  यशस्वीपणे पार पाडण्याचे आवाहन केले.  आजचा नियोजीत दौरा असला तरी  भविष्यात  अचानक भेट देऊन कामकाजाचा आढावा घेण्यात येईल व कामात कुचराई करणा-या अधिकारी , कर्मचा-यावर कडक कारवाई देखील करण्यात येणार असल्याचे त्यांनी  सांगितले.

                                                           * * * * * * * *