मुक्त विद्यापीठाच्या आगळ्या दिनदर्शिकेचे राज्यपालांच्या हस्ते प्रकाशन

              मुंबई, दि. 3 : "समाजातील अत्यंत दुर्लक्षित राहिलेल्या घटकांपर्यंत मुक्त विद्यापीठ शिक्षणाची गंगा नेत आहे ही गोष्ट प्रशंसनीय आहे. शिक्षणाने केवळ प्रमाणपत्र न देता समाजातील वंचित घटकांचे जीवनमान सुधारले पाहिजे," असे प्रतिपादन राज्यपाल डॉ. के. शंकरनारायणन यांनी केले.

            राजभवनमध्ये आज झालेल्या एका विशेष कार्यक्रमाच्या प्रसंगी ते बोलत होते. मुंबईचे डबेवाले, रेल्वे स्थानकांवर बूट-पॉलीश करणारे, घरकाम करणाऱ्या महिला, रिक्षा-टॅक्सी वाहनचालक, केश कर्तनालयातील कामगार, यंत्रमाग कामगार, आदिवासी भागातील युवक, गॅस सिलेंडर डिलीव्हरी बॉईज अशा शिक्षणापासून दूर असलेल्या समाज घटकांकरिता मुक्त विद्यापीठाने विविध शिक्षणक्रम विकसित केले आहेत. या शिक्षणक्रमाची माहिती छायाचित्रे व लाभार्थी विद्यार्थ्यांच्या प्रतिक्रिया असलेले कल्पक आल्हाददायक असे 'टेबल टॉप' कॅलेंडर मुक्त विद्यापीठाने छापले आहे. त्याचा प्रकाशन समारंभ आज राजभवन येथे राज्यपाल डॉ.के.शंकरनारायणन यांच्या हस्ते झाला.

            'समाजातील या आगळ्या-वेगळ्या विद्यार्थ्यांपर्यंत शिक्षणाची गंगा पोहोचवून आम्ही काय साध्य केले आहे ते इतरांना सांगण्याचा हा प्रयत्न नाही, तर ही दिनदर्शिका हे विद्यापीठ कोणत्या मूल्यांवर काम करीत आहे त्यांचे आम्ही आम्हांसच दिलेले स्मरणपत्र आहे.' असे उद्‌गार कुलगुरु डॉ.आर.कृष्णकुमार यांनी यावेळी काढले.

            मुक्त विद्यापीठाच्या विविध शिक्षणक्रमांनी विद्यार्थ्यांच्या जीवनात कसा बदल केला आहे हे सांगताना कुलगुरु म्हणाले, सकाळी 7 पासून रात्रौ 9 पर्यंत सलूनमध्ये लोकांचे केस कापणाऱ्या सलून कारागिरांनी जेव्हा विद्यापीठाचा शिक्षणक्रम अभ्यासला तेव्हा त्यांचे दिवसभराचे 300 रुपयांचे उत्पन्न 2,000 रुपयांपर्यंत गेल्याची उदाहरणे आहेत. सौंदर्य प्रसाधनांच्या अनेक कंपन्या आता या प्रशिक्षित सलून कारागिरांच्या मदतीला धावल्या आहेत. या प्रशिक्षित कारागिरांचा ग्राहकांवर असलेल्या प्रभावाचा उपयोग आपल्या मार्केटिंगसाठी कसा करता येईल त्यासाठी या  कंपन्या आता पुढे सरसावल्या आहेत. हे विद्यापीठ बदल घडविणारे विद्यापीठ आहे असेही ते यावेळी म्हणाले.

            यावेळी कुलगुरुसोबत सहयोग आणि नवीन उपक्रम विभागाच्या संचालिका डॉ.अनुराधा देशमुख, ग्रंथ निर्मिती केंद्राचे प्रमुख आनंद यादव, संस्थात्मक संप्रेषण विभागाचे प्रमुख श्रीनिवास बेलसरे, दृक श्राव्य विभागाचे संतोष साबळे आदी उपस्थित होते.