जळगाव जिल्ह्यात सिएमपी प्रणाली कार्यान्वित

जळगाव जिल्ह्यात सिएमपी प्रणाली कार्यान्वित

            शासनाकडून वेतन आणि अन्य देयके अदा करण्यासाठी  परंपरागत धनादेशाचा वापर करणे बंद होत असून सीएमपी प्रणालीचा वापर सुरु झाला आहे. जळगाव जिल्हाही त्यासाठी सज्ज झाला आहे. जळगाव जिल्हा मुख्यालयात सात आहरण संवितरण अधिका-यांकडे ही प्रणाली नोव्हेंबर महिन्यात प्रायोगिक तत्त्वावर राबविण्यात आली . ही चाचणी यशस्वी झाली असून याद्वारे कर्मचा-यांची वेतने, भत्ते व त्रयस्थांची देयके (third party paymeant) अदा करण्याची कारवाई यशस्वी झाल्याची माहिती जिल्हा कोषागार अधिकारी शि.बा. नाईकवाडे यांनी दिली आहे.

काय आहे सिएमपी प्रणाली ?

              C.M.P. ( Cash management product) शासनाकडून अदा होणारी विविध प्रकारची देयके अदा करण्यासाठी ही यंत्रणा भारतीय स्टेट बॅंकेने ही यंत्रणा विकसित केली असून त्यासाठी महाराष्ट्र शासन आणि भारतीय स्टेट बॅंक यांच्यात करार झाला आहे. त्यानुसार शासनाची सर्व देयके या प्रणालीद्वारे अदा केली जाणार आहेत. थोडक्यात आता पर्यंत वेतन व बिलांची प्रक्रिया ही आनलाईन होत होती मात्र प्रत्यक्ष वेतन व बिले अदा करतांना धनादेशाद्वारे केली जात होती. आता धनादेशाच्या प्रक्रियेचा टप्पा यातून वगळला जाणार असून  ई-पेमेंट पद्धतीने अदा करावयाची रक्कम थेट संबंधितांच्या बॅंक खात्यात जमा होणार आहे.

वर्षभरापासून प्रक्रिया

                ही प्रणाली राबविण्याची प्रक्रिया अंमलात आणण्यासाठी गेल्या वर्षभरापासून शासन पातळीवर तयारी सुरु आहे. त्यासाठी 22 जानेवारी 2013, 28 जून 2013 व 17 सप्टेंबर 2013  असे तीन शासननिर्णय यासंदर्भात काढ़ण्यात आले आहेत. त्याद्वारे याप्रक्रियेविषयी शासनाच्या विविध विभागांना अवगत करण्यात आले आहे.

जळगाव जिल्ह्यात यशस्वी चाचणी

               जळगाव जिल्हा मुख्यालयाच्या ठिकाणी विविध विभागांचे 166 आहरण संवितरण अधिकारी आहेत. त्यापेकी नोव्हेंबर महिन्यात  सात आहरण संवितरण अधिका-यांकडे ही प्रणाली राबविण्यात आली. त्यात जिल्हा कोषागार अधिकारी, सहायक संचालक स्थानिक निधी लेखा, जिल्हा सेनिक कल्याण अधिकारी, जिल्हा रोजगार व स्वयंरोजगार अधिकारी, विशेष भूसंपादन अधिकारी ( तापी खोरे), विशेष भूसंपादन अधिकारी (नं-1), वार्डन अनुसूचित जाती व जमातीच्या मुलींचे वसतीगृह या कार्यालयांनी आपल्याकडील 152 अदात्यांची (ज्यांना देयक अदा करावयाचे आहे अशा व्यक्ती, संस्था) नोंदणी करुन  त्यांना देयके यशस्वीरित्या अदा केलीत.  त्याआधी जुले महिन्यात जिल्हा रोजगार व स्वयंरोजगार अधिका-यांच्या कार्यालयातून तीन सेवा पुरवठादारांना त्यांनी केलेल्या कामाचे देयक अदा करण्यात आले.

जळगाव जिल्ह्यात सज्जता

             ही प्रणाली राबविण्यासाठी जळगाव जिल्ह्यातही जिल्हा कोषागार कार्यालयामार्फत सर्व विभागाच्या आहरण संवितरण अधिका-यांशी संपर्कात राहून सर्व सज्जता करण्यात आली आहे. जिल्हा मुख्यालयातील 166 आहरण संवितरण अधिका-यांनी त्यांच्याकडील अदात्यांची माहिती आनलाईन नोंदणी केली आहे. 30 नोव्हेंबर 2013 ही त्यासाठी डेडलाईन ठरविण्यात आली होती. प्रत्येक आहरण संवितरण अधिका-यांना या प्रणालीवर काम करता यावे यासाठी युजर आयडी आणि पासवर्डही पूरविण्यात आले आहेत.

त्यामुळे आता येथून पुढे शासनाची देयके ( वेतन-भत्ते व बिले)  ही या प्रणाली मार्फतच वितरीत होतील आणि रकमा थेट संबंधितांच्या बॅंक खात्यात जमा होतील. त्यामुळे आता सर्व आहरण संवितरण अधिका-यांनी त्यांची बिले ही सीएमपी प्रणालीद्वारेच सादर करावित असे आवाहन जिल्हा कोषागार अधिका-यांनी केले आहे.

यानंतर पुढ़ील टप्प्यात याबाबत तालुकास्तरावर कार्यवाही सुरु करण्यात येणार आहे, असेही जिल्हा कोषागार अधिका-यांनी सांगितले.

                                                         
           मिलिंद मधुकर दुसाने, माहिती अधिकारी, जळगाव

* * * * * * * * *

वनश्री, इंदिरा प्रियदर्शनी पुरस्कार विजेत्यांचे स्नेहसंमेलन संपन्न

वनश्री, इंदिरा प्रियदर्शनी पुरस्कार विजेत्यांचे स्नेहसंमेलन संपन्न

              जळगाव, दिनांक 7 :- वनश्री व इंदिरा प्रियदर्शनी पुरस्कार प्राप्त व्यक्ती, संस्थाचे स्नेह संमेलन हॉटेल क्वालिटी इन,  नाशिक येथे नुकतेच संपन्न झाले. या संमेलनास नाशिक, धुळे, जळगाव, अहमदनगर , नंदुरबार जिल्हयातील पुरस्कार प्राप्त व्यक्ती, संस्थाचे प्रतिनिधी उपस्थित होते.

            कार्यक्रमाचे उदघाटन नाशिकचे मुख्य वनसंरक्षक जी. साईप्रकाश यांचे उपस्थितीत संपन्न झाले यावेळी भाऊसाहेब मोरे, किरण चव्हाण, ए. एम. विसपुते, पी. एन. पाटील, उपस्थित होते. पुरस्कार प्राप्त विजेत्यांनी यावेळी आपले मनोगत व्यक्त केले.

          पुढील काळात संस्था, व्यक्ती यांचे वर्षानुवर्ष कामात सातत्य ठेवून त्याची व्यापकता वाढवली आहे. वृक्ष लागवड बाबत प्रोत्साहित करणे, विद्यार्थ्यामार्फत वृक्ष लागवड व परीसर स्वच्छता, इंधन बचत पर्यावरण पुरक बाबीमध्ये होत असलेली वाढ समाधान देणारी ठरली आहे.

            शासनाने पुरस्काराने सन्मानित केल्यानंतर या विजेत्यांनी आठवण ठेवून त्यांना सन्मानीत केले ही बाब सर्वांना आनंददायक ठरली इतरांनी याबाबत प्रेरणा घेऊन दर वर्षी असे संमेलन ठिक ठिकाणी विजेत्यांचे गावत आयोजित व्हावे अशी अपेक्षा उपस्थितांनी व्यक्त केली.

                                                                * * * * * * * *

चार चाकी वाहनांसाठी नवीन पसंती क्रमांक मालिका

चार चाकी वाहनांसाठी नवीन पसंती क्रमांक मालिका

        जळगाव, दिनांक 6 :- उप प्रादेशिक परिवहन कार्यालयातर्फे चार चाकी नवीन नोंदणी एमएच -19 / बीयु 0001 ते 9999 पर्यंतची मालिका लवकरच सुरु करण्यात येत आहे. ज्या वाहन धारकांना आपल्या वाहनांकरीता पसंतीचा नोंदणी क्रमांक हवा असेल त्यांनी उप प्रादेशिक परिवहन कार्यालयात अर्ज  करावा व विहित शुल्क भरुन पसंतीचा क्रमांक मिळवावा. नोंदणी शुल्क भरल्यानंतर वाहन 30 दिवसाचे आत नोंदणी करुन कागदपत्रे सादर करणे बंधनकारक राहील. या मुदतीत  वाहन नोंदणी न केल्यास भरलेले शुल्क परत होणार नाही. अधिक माहितीसाठी उप प्रादेशिक परिवहन अधिकारी जळगाव येथे संपर्क साधावा असे आवाहन करण्यात आले आहे.

     

* * * * * * * * *

पालकमंत्री संजय सावकारे यांचा जिल्हा दौरा कार्यक्रम

          जळगाव,दि. 6:-  राज्याचे कृषी, पशुसंवर्धन, दुग्धविकास, रोजगार व स्वयंरोजगार, सामाजिक न्याय आणि भटक्या व विमुक्त जातींचे कल्याण राज्यमंत्री तथा जळगाव जिल्हयाचे पालकमंत्री  संजय सावकारे यांचा जळगाव जिल्हा दौरा कार्यक्रम पुढीलप्रमाणे :-

            शनिवार दिनांक 7 डिसेंबर 2013 रोजी सकाळी 7.00 वा. महाराष्ट्र एक्सप्रेसने भुसावळ येथे आगमन, सकाळी 10.00 वा. तालुकास्तरीय विज्ञान प्रदर्शन 2013-14 स्थळ - सेंट अलाएंस हायस्कूल, भुसावळ, सकाळी 10.30 वा. शासकीय मोटारीने जळगाव कडे प्रयाण, सकाळी 11.00 वा. स्वावलंबन कार्यशाळेबाबत आढावा सभा स्थळ - जिल्हाधिकारी कार्यालय दालन, दुपारी 3.00 वा. लोकप्रतिनिधींच्या मौलिक सुचना विचारात घेणेबाबत आढावा सभा स्थळ- जिल्हाधिकारी कार्यालय  दालन , दुपारी सोयीनुसार  शासकीय मोटारीने रावेरकडे प्रयाण, दुपारी 4.00 वा. पशुवैद्यकीय दवाखाना भूमिपूजन रावेर, संध्याकाळी 5.00 वा. रुग्णालय उदघाटन स्थळ सावदा,  ता. रावेर, संध्याकाळी सोयीनुसार शासकीय वाहनाने भुसावळकडे प्रमाण.

               

* * * * * * * * *

पाल व खानापूर येथील येथील

मद्य विक्रीची दुकाने  8 डिसेंबर रोजी बंद

               जळगाव, दिनांक 6 :- मध्यप्रदेश राज्यातील विधानसभा निवडणुक मतमोजणी दिनांक 8 डिसेंबर 2013 रोजी संपन्न होत आहे. मध्यप्रदेश राज्याच्या सिमेलगत ब-हाणपुर तालुक्याच्या सिमेलगत जळगाव जिल्हयाची  सीमा येत असल्याने जळगाव जिल्हयातील पाल व खानापुर ता. रावेर हे गाव सिमेलगतची मदय विक्रीची दुकाने दिनांक 8 डिसेंबर 2013 रोजी मतमोजणीच्या दिवशी मतमोजपणी संपेपर्यंत बंद राहतील. सदर आदेशाचे काटेकोरपणे पालन करावे. आदेशाचे उल्लंघन केल्यास संबंधितांविरुध्द कडक कारवाई करण्यात येईल, असे जिल्हाधिकारी ज्ञानेश्वर राजूकर यांनी कळविले आहे.

     

* * * * * * * * *

निवृत्तीवेतन धारकांनी  15 डिसेंबर पूर्वी

हयातीचा दाखले सादर करावेत

        जळगाव, दि. 6 :- निवृत्तीवेतन घेणा-या निवृत्तीवेतनधारकांचे व इतर राज्य निवृत्ती वेतन,  कुटूंब निवृत्तीवेतन धारकांनी दिनांक 1 नोव्हेंबर 2013 रोजीच्या शासन निर्णया नुसार हयात असल्याचे व पुनर्विवाह न केल्याचे प्रमाणपत्र कोषागारास संबंधीत बँकेमार्फत सादर करणे आवश्यक आहे. प्रमाणपत्र, दाखला प्राप्त न झाल्यास माहे डिसेंबर 2013 चे निवृत्तीवेतन थांबविण्याबाबत आदेश आहेत. यापूर्वी दिनांक 20 नोव्हेंबर 2013 पावेतो हयातीचे दाखले सादर करणेबाबत कळविले होते. तथापि अजून 20 टक्के निवृत्तीवेतन धारकांचे हयातीचे दाखले प्रलंबीत आहेत.  तरी निवृत्ती वेतन धारकांनी हयातीचे दाखले संबंधीत बँकेस दिनांक 15 डिसेंबर 2013 पावेतो सादर करावेत. त्यानंतर प्राप्त होणा-या निवृत्ती वेतनधारकांचे निवृत्तीवेतन थांबविण्यात येईल, असे  जिल्हा कोषागार अधिकारी शि. बा. नाईकवाडे यांनी कळविले आहे.

     

* * * * * * * * *

                                हरभरा  व तूर कीड रोगाविषयी मार्गदर्शन व सल्ला

           जळगाव, दि. 6 :- जळगाव, भुसावळ, यावल, रावेर, मुक्ताईनगर, बोदवड या तालुक्यातील हरभरा, व तूर हे पीक मोठया प्रमाणात घेतले जाते.

          शासनाने या पिकांचे सर्वेक्षण करण्यासाठी तालुकास्तरावर कीड सर्वेक्षक व कीड नियंत्रक यांची नेमणूक केली आहे. सद्यस्थितीत  हरभरा व तूर पिकावर खालीलप्रमाणे किडींचा प्रादुर्भाव आढळून आला असून या रोग नियंत्रणासाठी कृषि विषयक सल्ला पुढीलप्रमाणे-

             तूर -  शेंग अळीच्या नियंत्रणासाठी इमॅमेक्टीन बेन्झोएट 2 मिली  + ॲसिटामीप्रीड 20 एसपी 10 मिली प्रति 10 लिटर पाण्यात 1 टक्का गुळाच्या द्रावणातून किंवा 25 ईसी क्विनॉलफॉस 20 मिली 10 लिटर पाण्यात मिसळून फवारावे.

         हरभरा- मरग्रस्त झाडे मुळांसकट ( माती बरोबर ) उपटून जाळून नष्ट करावीत. जेणे करुन पुढील प्रादुर्भाव वाढणार नाही. प्रति हेक्टर 1 ते 2.5 किलो ट्रायकोडर्मा पावडर 25 ते 30 किलो शेणखतात मिसळून पाण्याची  पाळी देण्या अगोदर टाकावे.

     

     * * * * * * * * *

केळी पिकावरील किड रोगाचे निर्मूलन करावे

केळी पिकावरील किड रोगाचे निर्मूलन करावे

           जळगाव, दि. 5 :- यावल, रावेर , मुक्ताईनगर तालुक्यातील केळी पिकांचे सर्वेक्षण करण्यासाठी तालुकास्तरावर किड सर्वेक्षण व किड नियंत्रकाची नेमणूक करण्यात आली आहे.

          सद्यस्थितीत केळी पिकावर किडींचा प्रादुर्भाव आढळून आलेला आहे. सदरचे किड रोग नियंत्रणासाठी कृषी विभागाने पुढीलप्रमाणे सल्ला दिला आहे. - फुलकिडीने प्रादुर्भाव झालेल्या केळी घडाचे निरीक्षण घेवून अपरीपक्व फळांवर खरचटल्या सारखा भाग दिसल्यास प्रादुर्भावग्रस्त फळांची नोंद घेवून 10  टक्के  किंवा 10-15 फुलकिडी प्रति केळीच्या बेचक्यात आढळल्यास ॲसिटामीप्राईड 5 मिली किंवा फिप्रोनील 15 मिली किंवा व्हर्टीसिलीयम 30 ग्रॅम +  स्टिकर 10 मिली 10 लिटर पाण्यातून फवारावे. किंवा 5 टक्के निंबोळी अर्क फवारावे.  पानाचा भाग जर करपाग्रस्त असेल तर प्रकाशसंश्लेषण क्रियेत अडथळा निर्माण होतो. त्यामुळे करपाग्रस्त पान पूर्णपणे न काढता फक्त करपाग्रस्त भागच काढावा. तसेच त्यावर प्रॉपीकोनॅझोल 5 मिली  +  खनीज तेल( मिनरल ऑईल ) 100 मिली 10 लिटर पाण्यातून फवारावे.

                                                                  * * * * * * *

                             ना. एकनाथराव खडसे यांचा जळगाव जिल्हा दौरा कार्यक्रम

          जळगाव, दि.5 :- महाराष्ट्र विधानसभेचे विरोधी पक्षनेते ना. एकनाथराव खडसे यांचा जळगाव जिल्हा दौरा कार्यक्रम पुढीलप्रमाणे आहे.

          शुक्रवार  दिनांक  6  डिसेंबर 2013 रोजी पहाटे 5. 40 वा. राजेंद्रनगर एक्सप्रेसने  जळगाव रेल्वेस्थानक येथे आगमन व शासकीय वाहनाने निवासस्थानाकडे प्रयाण,  

किंवा

          पहाटे 6.10 वा. अमृतसर एक्सप्रेसने जळगाव रेल्वेस्थानक येथे आगमन व शासकीय निवासस्थानाकडे प्रयाण, दिवसभर जळगाव जिल्हयातील स्थानिक विकास कार्यक्रमांना उपस्थिती.

             शनिवार दिनांक 7 डिसेंबर 2013 रोजी  संपूर्ण दिवस जळगाव येथे अभ्यागतांच्या भेटीसाठी राखीव ( स्थळ : मुक्ताई बंगला, जळगाव), रात्री 9.50 वा. जळगाव येथुन सेवाग्राम एक्सप्रेसने नागपुरकडे प्रयाण.

                                                                  * * * * * * *

लैंगिक शोषण संरक्षण अधिनियमात सुधारणा

लैंगिक शोषण संरक्षण अधिनियमात सुधारणा

           जळगाव, दि.4: फौजदारी प्रक्रिया संहिता, भारतीय पुराव्याचा कायदा आणि मुलांचे लैंगिक शोषणापासून संरक्षण अधिनियमात सुधारणा करण्यात आलेली आहे.  या सुधारणा दिनांक 3 एप्रिल 2013 पासून अंमलात आल्या असून यातील महत्वाच्या सुधारणा पुढीलप्रमाणे आहे. 

             भारतीय दंडविधान संहितेत कलम 326 (अ) व  (ब) अन्वये ॲसिड हल्ल्याच्या गुन्हयाकरीता 10 वर्ष ते आजीवन कारावासाची शिक्षा दिली आहे. कलम 354 अन्वये महिलेच्या विनयभंगाच्या गुन्हयात 1 ते 5 वर्षाच्या तुरुंगवासाची शिक्षेची तरतूद केली आहे. कलम 354 (अ) अन्वये लैंगिक छळांच्या गुन्हयाकरीता  3 वर्षाच्या सश्रम कारावासाची शिक्षा दिली आहे. कलम 354 (ब), 354 (क) व 354 (ड) अन्वये महिलांविरुध्द होणा-या पाठलाग, लपून पहाणे, चित्रीकरण करणे इत्यादी गुन्हयाकरीता शिक्षेची तरतूद केलेली आहे. कलम 370 अन्वये शोषणाकरीता केलेल्या मानवी वाहतुकीच्या गुन्हयाकरीता 7 ते 10 वर्षाच्या सश्रम कारावासाची शिक्षेची तरतूद केली आहे. कलम 375 मध्ये बलत्काराच्या गुन्हयाची सुधारीत व्याख्या दिलेली आहे. कलम 376 अन्वये बलात्काराच्या गुन्हयाकरीता कमीत कमी 7 वर्ष ते आजीवन कारावाची शिक्षेची तरतूद केलेली आहे.

* * * * * * *

बालकल्याण क्षेत्रात उत्कृष्ठ कार्य करणाऱ्‍या

स्वयंसेवी संस्थांनी पुरस्कारासाठी प्रस्ताव सादर करावेत

             जळगाव, दि. 4 :- सन 2013-14 या वर्षासाठी महिला व बालकल्याण क्षेत्रात उत्कृष्ठ कार्य करणाऱ्‍या समाजसेविका व स्वयंसेवी संस्थांना अहिल्यादेवी होळकर पुरस्कार देण्यात येणार आहे. जळगाव जिल्हयातील महिला व बालकल्याण क्षेत्रात उत्कृष्ठ कार्य करणा-या नामांकीत समाजसेविकांना राज्यस्तरीय, जिल्हास्तरीय आणि स्वयंसेवी संस्थांना विभागीयस्तरीय पुरस्कार देण्यासाठी योग्य महिलांचे व संस्थाचे प्रस्ताव मागविण्यात येत आहे. तरी पात्र महिला व स्वयंसेवी संस्थांनी विहित नमुन्यात आवश्यक त्या कागदपत्रासह प्रस्ताव सादर करावेत , अधिक माहिती व विहित नमुना अर्जाकरीता जिल्हा महिला व बालविकास अधिकारी कार्यालय, दुसरा मजला, मध्यवर्ती प्रशासकीय इमारत, आकाशवाणी जवळ जळगाव येथे संपर्क साधावा असे आवाह प्रसिध्दी पत्रकान्वये केले आहे.

* * * * * * *

डाक अदालत 18 डिसेंबर रोजी

डाक अदालत 18 डिसेंबर रोजी

            जळगाव, दिनांक 3 :- पोस्टाच्या टपाल, स्पीड- पोस्ट, काउंटर सेवा, डाक वस्तु, पार्सल, बचत बॅक, मनीऑर्डर आदि कामासंबंधीच्या तक्रारीचे निवारण करण्यासाठी अधिक्षक डाकघर जळगाव येथे दिनांक 16 डिसेंबर 2013 रोजी सकाळी 11 वाजता  डाक अदालतचे आयोजन करण्यात आले आहे.

              पोस्टाच्या कामासंबंधीच्या   तक्रारींचे सहा आठवडयाच्या आत निराकरण झाले नसेल व समाधानकारक उत्तर मिळाले नसेल, अशा तक्रारींची दखल डाक अदालतमध्ये घेण्यात येणार आहे. तरी संबंधितांनी   आपली तक्रार दोन प्रतीत सहाय्यक निदेशक (तक्रार) तथा सेक्रेटरी, डाक अदालत, चीफ पोस्टमास्तर जनरल, महाराष्ट्र सर्कल, मुंबई यांचे कार्यालय, मुंबई जी. पी ओ बिल्‍िडंग दुसरा माळा, मुंबई  यांच्या नांवे अतिरिक्त प्रतीसह दिनांक 5 डिसेंबर 2013 पर्यत अथवा तत्पूर्वी पोहोचेल, अशा बेताने पाठवावी  संबंधितानी डाक अदालतीचा लाभ घ्यावा  असे आवाहन  चीफ पोस्टमास्तर जनरल, महाराष्ट्र सर्कल, मुंबई यांनी केले आहे.                     

* * * * * * *

कामगार न्यायालयाची लोकअदालत 8 डिसेंबर रोजी

            जळगाव, दिनांक 3 :- कामगार न्यायालय, जळगाव येथील प्रलंबीत असलेले खटले तडजोडीने व लवकरात लवकर निपटारा करण्यासाठी सदस्य सचिव, जिल्हा विधी सेवा प्राधिकरण जळगाव यांच्या मार्फत रविवार दिनांक 8 डिसेंबर 2013 रोजी सकाळी 10.30 वाजता कामगार न्यायालय परिसर, जुने बी. जे. मार्केट, 3 मजला, 3 रा मजला, जी गाळा, जळगाव येथे लोकअदालत घेण्यात येणार आहे. तरी ज्यांना लोक अदालतमध्ये केसेस ठेवावयाच्या असतील त्या सर्व संबंधितांनी स्वत: संमतीपत्रक भरुन द्यावे असे  आवाहन न्यायालय अधिक्षक अशोक पानपाटील यांनी केले आहे.

* * * * * * *

निवृत्तीवेतन धारकांचा मेळावा

             जळगाव, दि. 3 :- जिल्हयातील राज्य शासकीय निवृत्तीवेतन धारकांचा  दिनांक 11 डिसेंबर 2013 रोजी सकाळी  11 वा. जिल्हा कोषागार कार्यालय,जिल्हाधिकारी कार्यालयाशेजारी जळगाव येथे मेळावा आयोजित केला आहे.

            या मेळाव्यामध्ये निवृत्तीवेतनधारकांना मिळणारे निवृत्तवेतन व इतर लाभ देण्यासंबंधी येणा-या अडीअडचणींचा आढावा घेण्यात येणार आहे. तरी संबंधितांनी मेळाव्यास उपस्थित रहावे, असे आवाहन शि. बा. नाईकवाडे जिल्हा कोषागार अधिकारी यांनी केले आहे.

* * * * * * *